همسة عتاب

كنت بسمع همسة عتاب ومصدقتش ان الموظف اللى بيقول فوت علينا بكره ياسيد ممكن يكون موجود فى الواقع لغاية ماروحت لتوثيق بعض الاوراق

وهناك شوفت الموظفين فى الواقع

بعد لفه كبيره من موظف لموظفه وصلنا للمدير وهناك كان فيه بعض الجمهور بيعرضوا مشاكلهم

سيده معاها توكيل وعايزه تعمل منه نسخه وده الحوار

السيده لوسمحت التوكيل ده وقع عليه ميه واتشلفط وقالولى اعمل نسخه منه علشان يعترفوا بيه

المدير ورينى كده مهو كويس اهو وواضح كمان

السيده الموظف اللى روحت له قال لازم اعمل منه نسخه او صوره طبق الاصل

المدير خدى طلب وامليه بس خدى بالك مش هتاخديه غير بكره

السيده ليه بكره مينفعش النهارده

المدير ده كمان ممكن ميتعملش بكره ياخد له خمس ست ايام عما يتعمل الموظف اللى المختص اللى عندى فى اجازه والتانى قاعد على الخزنه اعمل ايه اخر السنه ومعنديش موظفين وكام مره اقول عايز موظفين ومحدش عايز يفهم

السيده طب هى دى مشكلتى مافيه ناس كتير عايزين شغل ماتشغلوهم

وسكتت شويه وجابت صوره من شنطتها وقالت

السيده ممكن تكتب على الصوره دى طبق الاصل وتختمها

المدير قولت لك مينفعش من غير ما الموظف يطلع على الدفاتر

وخد منها الورق وفضل يشاهد اللى واقفين ياعالم التوكيل ده مش واضح وقال

المدير روحى على طول لمدير الموظف المتعسف ده وقولى له التوكيل واضح

وطبعا السيده زهقت منه ومشيت

وجه اللى بعدها يقدم طالبه

الرجل كنت عايز اعمل توكيل لمحامى والموظف اللى عندك شاف البطاقه قال دى انتهت وانا مستعجل فقدمت له رخصة القياده قال متنفعش قولت طب جواز السفر

المدير مينفعش لا الجواز ولا الرخصه ممكن تجيب معاهم شهادة ميلاد بالكمبيوتر

الرجل ليه ان شاء الله مش جواز السفر ده بتعامل بيه قدام دول العالم والرخصه دى مش طالعه من وزارة الداخليه يعنى الشهاده اللى مفيهاش صور ولا حاجه هى اللى هتثبت انى انا

المدير بلاش فلسفه دى أوامر واحنا بننفذها روح جدد البطاقه أحسن

عمار يامصر برجالك المخلصين اللى مش متعسفين

العيب مش فى القانون العيب فى اللى بيطبق القانون محتاجين نغير عقول الموظفين علشان مصالح الناس تمشى ومعدش يبقى فيه همسة عتاب

يوم ليك ويوم عليك

رن التليفون فى وقت مبكر من الصباح قبل أذان الفجر بقليل نظرت بخوف لقيت نمرة أخى

ربنا يجعله خير وسألت بلهفه خير سألنى عن ابنه الوحيد هل هو عندى ام لا قولت قالى انه جاى ومجاش للوقت ليه ايه اللى حصل قالى شوية خلافات مع خطيبته وملخبطاه احنا خلاص فسخنا الخطوبه كنا غلطانين اننا خطبناله ودلوقتى الواد بيقول بتفسخوا الخطوبه بعد ماحبتها انا هخدها غصب عنكوا والبنت موافقه ومستعده تهرب معايا

وقفلت معاه وطلبت ابنه علشان اطمن عليه وتليفونه كان مقفول وفضلت افكر وأفتكرت يااااه

كل ده كان زمان بيحصل من اخى هو ومراته مع امه وابوه وكأن التاريخ بيعيد نفسه وماما دعت عليه فى يوم من الايام ابنه يتعبوا كده زاى مهو تاعبهم

افتكرت لما جت بنت صغيره فى سن المرهقه وسكنت البيت اللى قصادنا وشافها اخى اللى فى نفس السن تقريبا وكان عامل رهان مع 2 اصحابه مين فيهم هيقدر يوقعها فى حبه واللعبه قلبت بجد وحبوا بعض لكن فى سن مينفعش فيه حب وارتباط وراح لمامته يترجاها تخطب له بنت الجيران وكان الرفض من الناحيتين ازاى يجوزوا عيال لسه فى المدرسه لبعض وقالوا انتظروا لما تكبروا لكن هما مين كانوا بيتقابلو وبدأ اخى يضغط على اهله ويغضب على الاكل ويسيب البيت كل ده علشان يوافقوا يخطبوا بنت الجيران

ومر 7 سنوات واخيرا الاهل وافقوا على الزواج ودلوقتى ابنهم اللى محبش وخطب بموافقتهم علشان ميجبش واحده مش على هواهم طلعت مش على هواهم فعلا وابنهم حبها وميقدرش يبعد عنها وبيمارس عليهم نفس الضغط اللى كانو بيعملوه على اهلهم ويسيب لهم البيت ويشغلهم عليه باليوم والاتنين ربنا يمهل ولا يهمل داين تدان

انتحار خروف

بعد عناء السفر الطويل وصل بلد مش عارف هو فين ولسه مرتاحش من السفر وجه راجل خده هو وصديقه وركبهم عربية تانى هيسافر هيروح فين مش عارف وهما ماشين سمع الراجل بيتكلم ويقول انه هيضحى بيهم اول يوم العيد وجابهم بدرى شويه علشان العيال يلحقوا يلعبو معاهم شويه قبل الاضحيه

كل خروف بص لتانى وقال يا خراشى هما جايبنا من الصومال وماشين كل الطريق ده علشان ندبح هنا

ونزلو من العربية على بيت سلالمه عاليه جدا تعبوا جدا من طلوع السلالم وأخيرا شافوا السطح والعيال طلعت وراهم علشان تلعب معاهم

والعيال تجرى والخرفان قدام لما تعبوا خالص

الاول فكر يهرب من العيال والدبح وقال انط من على الصور ومخدش باله انه فى الدور الخامس وطبعا نزل محطش منطق

التانى قال مش ممكن انط زيه ويحصلى كده انا هنزل زى ماطلعت وجرى على السلم ومحدش قدر يلحقه حوش ياعم واستخبى فى الغيط وبقى وحيد شريد تفتكرو قدر يهرب من قدره ولاادبح ؟!

حكايات جدتى

كنت دائما أحب الجلوس مع جدتى أسمع حكاياتها وأتعلم من تجاربها كانت لى صديقة كما كانت لأمى وكنت أحيانا لاأشعر بأى فرق بين الأجيال

حكايتها بدأت بميلادها يتيمه لن ترى والدها وكانت والدتها تتمنى ان تكون ناظرة (كدا مره واحده)دون ان تمر بالتدرج الوظيفى من معلمة الى ناظرة للمدرسة

ذهبت الطفلة (جدتى) الى المدرسة وكلها أمل فى تحقيق حلم أمها وبدأت تتعلم لكن كانت تنظر لمعلمتها بشغف وتدقق فى تفاصيل الفستان الذى ترتديه كيف صمم هذا الموديل كيف خيط وتجرى على البيت تبحث عن بقايا القماش وتفصل نفس الموديل وتلبسه لعروستها اللى من صنع يدها أيضا وفى الصباح تأخذ عروستها وهى فرحانه وترى المعلمة العروسة ترتدى نفس الموديل وبدلا من ان تشيد بموهبة الطفلة تنهرها وتضربها ضربا مبرحا جعلها تكره المدرسة وتكره المعلمة لأخريوم فى عمرها

وبدلا من أن تكون موهوبه ومتفوقه فى الدراسة تكره التعليم وتتجه للموهبه وتنجح نجاح غير عادى كانت أصغر محترفه لتفصيل الملابس ولايصدق من يراها انها تعرف تمسك المقص وكانت تبهر الجميع بالنتائج

فلو كانت هذه المعلمة تعلمت شئ من دروس التربوى اللى درستها مكنتش ولاتلميذة ولاتلميذ فى المدرسة كرهوا التعليم

أيها المعلمين والمعلمات فى أول مراحل التعليم عاملوا تلاميذكوا بحنان وحب علشان يحبكوا أولا قبل حب مايدرسوه على أيديكم ويحبوا العلم للعلم وليس لنجاح فى الامتحان فقط ويتغير المجتع للأحسن

بسم الله

بسم الله نبدأ فى أول تدوين فى عالم المدونين و منذ زمن بعيد أتابع هذا العالم فى صمت وكم تمنيت ان أنضم لهذه الاسرة ومن أكثر من قرأت لهم د0 ستيته حسب الله الحمش وكمان روح طفله مش عايزه تكبر وياريت تفضل طفله على الدوام علشان أحلى أيام العمر هى الطفوله وأميره على كوكب مهجور اللى مش عارفه ليه راحت الكوكب ده لازم تشوف كوكب فيه حياه وأختيار شيما الموفق فى ان الشعب لابد له من حكومه تشكومه لأنه يستحق الشكم وعاشقة الاحزان وليه تعشق الاحزان طب ليه مش الافراح لما تعشق الافراح هتلاقيها دايما ومش هطول أكتر من كده علشان متتعبوش من القراءه