كنت بسمع دايما فى الافلام معاك قرش تساوى قرش وان الانسان قيمته بتتقاس باللى معاه من فلوس
أستغربت جدا لما لقيت برنامج 48 ساعة مباشر الصبح قولت أشوف ايه الحدث الجلل اللى خالاهم يغيرو ميعاد البرنامج والاغرب انى لقيتهم عاملين البرنامج مخصوص علشان رجل الاعمال صاحب المال المحكوم عليه بالإعدام
علشان يدافعو عنه ويعملو تحليل لما حدث من هشام وكمان يكون عندهم السبق بالنطق بالحكم وبرنامج وقته مفتوح
لغاية القاضى مايوافق على طلب اعادة المحاكمه والاكيد انه هيطلع براءه بفلوسه
الأغرب ان فيه برامج اخرى كانت فى نفس الوقت كانت عامله توك شو عن نفس القضيه وناس غلابه جايين يقولو على هشام انه راجل ملاك وفاتح بيوت وبيعمل خير ورجل البر والإحسان والتقوى
والكل نسى ايه القضيه اللى هو دخل السجن علشانها واتحكم عليه بالإعدام
بفلوسه عمل برامج تدافع عنه ومسلسلات مش مسلسل واحد علشان الناس تتعاطف معاه وتبقى قضية راى عام
على النقيض شوفت موظف فى برنامج اتحكم عليه ظلم وبالإعدام وفضل يقاضى 9 سنوات لغاية ماطلع براءه ولما
رجع للدنيا بره السجن ملقاش شغل ولاحد عايز يوافق انه يرجع شغله ولا يتساوى بزمايلو اللى فى نفس الوظيفه
ومش عارف يأكل ولاده رغم انه طلع براءه لكن غلبان معندوش فلوس زاى هشام باشا
المهم الفلوس فى الزمن ده هى التى تتحدث وأصبح المال المتحكم فى كل شئ فى الحياه
هناك 16 تعليقًا:
أول تعليق
المال من زمان أوي بيطلع ناس وبينزل ناس
من عهد الرسول صلى الله عليه وسلم لما الناس كانوا بيقولوا ان الشريف هو اللي بيبقى معاه فلوس وليه مكانه في قومه مش بيقيموا عليه الحد والرسول صلى الله عليه وسلم صحح لهم المعلومة دي
وقالهم ان الغني والفقير الاتنين سواء والاتنين بيطبق عليهم الشريعة والقانون لو غلطوا
لكن المفهوم ده مترسخ في الناس ان اللي معاه قرش فعلا بيسوى قرش زي ما الأفلام بتقول
ومنقدرش نقول غير
ربنا يصلح الأحوال
موضوع مميز كالعادة يا حنين يا حبيبتي
Lady E
كلامك صح ياليدى والرسول انهى معاملة الناس على حسب مالهم أو أنسابهم
ولكنه أشار الى زمن هيرجع فيه التعامل بالمال والانساب وهيكثر فيه الفساد
ربنا يهدى ويرحم الفقراء برحمته
ويصلح الاحوال أحوال كل البشر
شكرا على مجاملتك وربنا يبارك فى صدقتنا
الفلوس دلوقتى هى لغه العصر!!!
يبتليهم كلهم بجاموسة حوله
قولى امين
**وحشنى عصير البرتقان احديفنى ببرتقانه!!
يستجاب منك ربنا ياكيكى وتكون حوله وهابله علشان متاخدش اعدام
بقيتى مدمنه برتقال عموما احسن من ادمان الشكولاته
ربنايسهل ونتقابل قريب وجيبلك قفص برتقال
الا بقى سوال النقض بتاعه اتقبل على كده ؟؟
الموضوع طول قوى :-((
بس
يارب فى الاخر الصح هو الى يتعمل
اصل الميزان المقلوب زى المركب الغرقانة
بتسحب الكل معاها
لتححححححححححت
فعلا معاكى حق
بقى مبدأ فى الحياه معاك قرش تساوى قرش
ومعاك فلوس الناس تشيلك فوق راسها والغلبان ينداس تحت الرجلين
للأسف كان عجبنى صرامة القضاء فى البدايه بس طبعا ألاعيب المحامين حولت الدفه بس الديان لا يموت
حنين
الفلوس فلوس
هشام ده اعمال وبورصه وهيلمان اه
لكن اللي ربنا رايده هيحصل
وكمان ماتعلميش بكره هيكون في ايه
وماربك بظلام للعبيد
سلامي
السلام عليكم ورحمة الله
لو معاك قرش تساوى قرش
للأسف المقوله دى هى اللى ناس مؤمنه بيها فى كل حياتهم
كأن اللى معاه فلوس هو اللى يستحق انه يعيش
والناس اللى على قد حالها مش تستحق
ودا اكيد ملاحظ فى حياتنا العاديه
ونظام الكوسه والواسطه والرشاوى
وقولى على الدنيا يلا السلام
ربنا يهدى الجميع لما يحبه ويرضاه
دمتى يكل خير
اولا ازيييييك يا حنين
ثانيا للأسف فعلا ناس كتير ماشية بمبدأ اللى معاه قرش
زمان مكنتش بقتنع ان الفلوس تقدر تعمل كل حاجه ... بس اكتشفت ان الفلوس مع النفوس الضعيفة بتغير كل القواعد للعكس للأسف
Wanda
أكيد النقض أتقبل وان شاء الله هيتحكم بالبراءه
وطبعا الميزان مقلوب مش بس على مستوى الدوله لكن على مستوى الفرد
ربنا ينصر الحق
مرايتى
أكيد لغة المال هى اللى بتتكلم فى هذا الزمان
والقوى قوى بماله والضعيف اللى ممعهوش
هى كلها تمثيليه من الأول ده قاعد فى سجن فيف أستار الموبايل فى السجن والمواطن العادى بياخدوه منه على باب القسم
وطبعا الديان لايموت وهيظهر الحق
شمس النهار
وعليكم السلام
طبعا أسهم البورصه أهتزت لسجن والحكم على هشام بالأعدام ولكن هل هذا مبرر
أكيد أرادة ربنا فوق الجميع ولا يظلم عبيده
صمت الحنين
وعليكم السلام ورحمة الله وبركاته
فعلا الناس اللى على قد حالها متقدرش تعيش فى الزمن ده رغم ان الحكومه بتحاول ترفع من مستوى الغلابه ولكن اللى معاهم فلوس مستكترين عليهم ذلك وبياخدو حقهم
ربنا يستجاب منا ويهدى الجميع
فراشة
الحمد لله بخير ونعمه وحشانى من شوية مجتيش لزيارتى
أكيد العالم الأن بيتكلم بلغة المال فى كل المجالات
الفلوس مش بس بتأثر على النفوس الضعيفه
وعلى فكره فيه مدونين كتير من المنوفيه وممكن نعمل لقاء ونتقابل ان شاء الله
للاسف في الزمن دا الفلوس بقت كل شيء
اللي معاه بيعيش والناس بتبقي تحت طوعه واللي مش معاه بيموت تحت رجلين الاغنيا
مش عارفين هيوصلوا لحد فين
بس فعلا الكفن مالوش جيوب
ربنا يهدينا جميعا واياكم
دمت بكل خير
صمت المشاعر
اهلا بك عندنا
يظن البعض ان المال هو كل شئ
ولكن فيه حاجات مش ممكن تتباع بالفوس ولا حد ممكن يشتريها
وربنا يهدى اللى المال عندهم اهم شئ فى الحياه
إرسال تعليق